Gyda'r Llywodraeth yn parhau i fod o dan bwysau ariannol, mae nifer yn darogan bydd angen i Rachel Reeves godi trethi yn y Gyllideb nesaf, tua diwedd mis Hydref. Er nad oes unrhyw newidiadau wedi'u cadarnhau, mae'r newidiadau posib yn cynnwys:
1. ISAs: gostyngiad yn y lwfans ISA blynyddol ar gyfer cyfrifon banc (y lwfans blynyddol presennol yw £20,000).
2. Treth ar eiddo: cynyddu cyfraddau treth ar eiddo, yn benodol o werthiant tai.
3. Cyfraniadau pensiwn: cyfyngiadau posibl ar ryddhad treth cyfradd uwch ar gyfraniadau pensiwn. Mae yna sïon hefyd am newidiadau posib i gynlluniau aberthu cyflog ('salary sacrifice') sy'n cael eu defnyddio i arbed treth, megis cynlluniau pensiwn y gweithle a cheir trydan trwy gwmni.
4. Tynnu arian o bensiwn: mae'r wasg ariannol wedi bod yn adrodd ers tro am y posiblrwydd o leihau'r uchafswm o faint o arian di-dreth y gellir ei gymryd o'ch pensiwn.
5. Treth etifeddiaeth: newidiadau i ganllawiau y 'rheol 7 mlynedd' ar gyfer rhoi asedau ac uchafswm posib ar werth asedau gall unigolyn ei roi yn ystod eu hoes. Yn ddiweddar, cyn i unrhyw newidiadau posibl gael eu cyhoeddi, mae'r Financial Times wedi adrodd bod mwy o unigolion yn trosglwyddo a rhoi asedau i "gychwyn y cloc 7 mlynedd", gan boeni y gallai newidiadau yn y dyfodol newid y rheolau er gwaeth.
Er nad oes unrhyw un o'r newidiadau hyn wedi'u cyhoeddi yn swyddogol, y cyngor cyffredinol yw os ydych chi'n bwriadu gwneud unrhyw benderfyniadau ariannol mawr, efallai yr hoffech chi ystyried eu gwneud o dan y rheolau a'r cyfraddau treth presennol.
Cysylltwch â ni os hoffech chi drafod unrhyw fater. Mae Aled wedi gweld cynnydd diweddar mewn ymholiadau treth ar eiddo o werthiant tai, tra bod Huw wedi sylwi ar gynnydd amlwg mewn ymholiadau treth etifeddiaeth.
Cwestiynau Huw ac Aled
C: Dwi'n bensiynwr a dwi'n deall bydd taliadau tanwydd gaeaf yn cael eu cymeradwyo i bob pensiynwr y gaeaf hwn. Dwi hefyd wedi clywed, os ydych chi'n ennill mwy na £35,000, y bydd angen i chi ad-dalu hyn i'r Llywodraeth. Sut fydd hyn i gyd yn gweithio?
A: Mae llawer o ddryswch wedi bod ynghylch sut bydd y broses newydd ar gyfer taliadau tanwydd gaeaf yn gweithio.
Bydd taliadau tanwydd gaeaf bellach yn cael eu prosesu i bob pensiynwr yng Nghymru a Lloegr y gaeaf hwn (mae rheolau gwahanol yn yr Alban a Gogledd Iwerddon).
Os yw cyfanswm incwm pensiynwr yn uwch na £35,000, bydd y Swyddfa Dreth yn adennill y taliad tanwydd gaeaf naill ai trwy'ch côd treth ar gyfer 2026/2027 (os ydych yn derbyn pensiwn gweithle neu breifat sy'n cael ei drethu 'at source'), neu, os ydych yn cwblhau ffurflenni treth hunanasesiad blynyddol, bydd y taliad tanwydd gaeaf yn cael ei ad-dalu i'r Swyddfa Dreth trwy'ch ffurflen dreth, gyda'r swm yn cael ei ychwanegu at eich bil treth terfynol.
