Ar yr adeg aeth y rhifyn yma i'r wasg, doedd Cyllideb cyntaf Rachel Reeves ddim eto wedi cael ei gyhoeddi. Byddwn yn dadansoddi canlyniadau'r Gyllideb yn rhifyn mis nesaf.
- Mae unigolion sydd ddim angen cyflwyno ffurflenni treth hunanasesiad wedi dechrau derbyn 'asesiadau treth syml' wrth y Swyddfa Dreth ar gyfer 2023-2024. Mae'r asesiadau yma yn cynnwys eich incwm cyflogaeth neu pensiwn, yn ogystal â'ch incwm llog ar gynilion.
Mae tua 140,000 o bensiynwyr sydd ond yn derbyn Pensiwn Gwladol fel incwm yn mynd i dderbyn yr asesiadau treth yma hefyd, gan bod y Pensiwn Gwladol bellach yn uwch na'r lwfans di-dreth blynyddol o £12,570.
Gwiriwch y ffigyrau yn yr asesiadau yn ofalus iawn, yn enwedig y symiau llog o'r banc, gan fod gwallau i'w gweld yn aml yn y cyfrifiadau yma.
- Bu erthygl drist iawn yn y wasg yn ddiweddar, lle cafodd gŵr a gollodd ei wraig ei chael hi'n amhosib i gael gafael ar gyfrinair ffôn symudol ei wraig i gael lluniau ar gyfer ei hangladd, gan gynnwys lluniau o ddiwrnod eu priodas.
Pan mae rhywun yn marw, mae gwaith gweinyddol sylweddol, yn ariannol ac anariannol. Efallai hoffech gadw rhestr o'ch manylion mewngofnodi a chyfrineiriau ar gyfer ebyst, eich ffôn, ac ati mewn man diogel ar gyfer aelodau'ch teulu.
- O 7 Hydref 2024 ymlaen, cyhoeddwyd rheolau newydd i amddiffyn cwsmeriaid rhag sgamiau 'Authorised Push Payment' neu 'APP'. Mae'r sgamiau yma yn digwydd pan fydd rhywun yn cael ei dwyllo i anfon arian at dwyllwr sy'n honni ei fod yn berson neu'n gwmni dilys.
O dan y rheolau newydd, gallai taliad a wnaed trwy fancio ar-lein fel rhan o sgam gael ei ad-dalu. Ar hyn o bryd, yr uchafswm o ad-daliad yw £85,000 ac mae'n rhaid i chi hysbysu'ch banc o fewn 13 mis i'r taliad terfynol gael ei wneud i'r twyllwyr.
Cwestiynau Huw ac Aled
C: Rwy'n helpu gyda elusen fach sydd angen mynediad at arian ar gyfer prosiectau. Oes rhaid i mi wneud cais i bob sefydliad unigol neu a oes gwefannau sy'n darparu cyfeirlyfr o sefydliadau?
A: Bydd unrhyw un sy'n ymwneud ag elusennau yn gyfarwydd â phroblemau codi arian a cheisiadau am grantiau. Weithiau, mae cyrff arbennig ar gyfer eich math penodol o sefydliad. Dwy wefan a allai rhoi manylion nifer o ddarparwyr grantiau yw “Sefydliad Cymunedol Cymru” ac “Ariannu Cymru”. Er nad ydynt yn cynnwys manylion pob elusen a sefydliad, gallant ddarparu rhai cysylltiadau defnyddiol. Pob hwyl gyda'r ymdrech codi arian!
