Ydych chi wedi gwirio eich cofnod Yswiriant Gwladol (YG) a rhagolwg eich Pensiwn Gwladol? Os nad ydych chi wedi talu digon o YG mewn unrhyw flwyddyn rhwng 2006 a 2016, y dyddiad cau ar gyfer dal i fyny ar daliadau ar gyfer y cyfnod yma yw Ebrill 2023.
Yn gyffredinol, mae angen i unigolyn dalu o leiaf 35 mlynedd o YG i fod yn gymwys i dderbyn y Pensiwn Gwladol llawn. Fodd bynnag, mae'n bwysig hefyd i chi wirio rhagolwg eich Pensiwn Gwladol achos gall hyn ddangos nad ydych, ar hyn o bryd, yn gymwys i dderbyn y Pensiwn Gwladol llawn.
Gallwch wirio rhagolwg eich Pensiwn Gwladol yma:
https://www.gov.uk/gwirio-eich-pensiwn-y-wladwriaeth
Mae adroddiadau diweddar wedi dangos bod ymddiriedolaethau cyfalaf menter ('Venture Capital Trusts', neu 'VCTs') wedi dod yn fuddsoddiad cynyddol o boblogaidd. Mae'r poblogrwydd yn deillio o'r rhyddhad treth sydd ar gael, ond mae'n bwysig cofio bod rhain yn buddsoddi mewn cwmnïau newydd ac felly gall y colledion fod yn sylweddol uwch nag unrhyw ryddhad treth. Byddwch yn ofalus wrth ystyried unrhyw fuddsoddiad.
Cwestiynau Huw ac Aled: mae gan fy rhiant oedrannus ddementia ac mae'n mynd i fyw naill ai gyda mi neu mewn cartref gofal preswyl. A oes unrhyw ystyriaethau treth?
Pan mae unigolion oedrannus yn gorfod gwerthu eu heiddo a derbyn gofal, mae 2 lwfans treth ychwanegol posibl ar gael.
Os oes bwlch yn y cyfnod o amser rhwng gadael eu cartref a gwerthu’r tŷ, efallai oherwydd bod y tŷ yn cael ei rhentu i denantiaid, cynyddir y cyfnod o berchnogaeth lle mae rhyddhad llawn yn erbyn treth ar eiddo o’r 9 mis olaf arferol o berchnogaeth i 36 mis. Gall hyn leihau neu ddileu unrhyw oblygiadau treth ar eiddo. Yn ogystal, mae rhyddhad llawn ar gael ar gyfer yr amser pan oeddent yn byw yn eu cartref.
Mae lwfans treth etifeddiaeth o £175,000 ar gael i unigolion lle gadewir cartref y teulu i blant neu i wyrion a wyresau. Pan fydd rhieni’n mynd mewn i ofal neu’n mynd i fyw gyda’u plant, os caiff y tŷ ei werthu tra’u bod yn fyw, gellir dal hawlio’r lwfans hwn yn y pen draw o dan yr hyn a elwir yn “downsizing allowance”.
Os ydynt yn weddw, efallai y gallant hefyd hawlio lwfans ar gyfer eu priod ymadawedig.
